Reverendo in Christo patri ac Domino [Willelmo] Dei gratia Bituricensi archiepiscopo, R. eadem gratia primæ Lugdunensis ecclesiæ archiepiscopus, et W. ejusdem ecclesiæ decanus, [salutem] et sinceram in Domino caritatem. Noverit paternitas vestra nos abbatem Menatensem et conventum ipsius loci, propter multiplicem contumaciam suam, qua super causa quæ vertebatur inter eos et abbatem Cluniacensem ex delegatione summi pontificis coram [nobis] extitit idem abbas inobediens et rebellis, post etiam præstitam juratoriam cautionem ut nostro pareret mandato, excommunicationis sententia innodasse, eadem vobis auctoritate mandantes ut dictum abbatem Menatensem et conventum pro excommunicatis habeatis, et faciatis eos per Claromontensem diocesim excommunicari; ut sic saltim hujus sententiæ rubore perfusi ad humilitatem redeant mandato apostolico parituri.