R. Dei gratia primæ Lugdunensis ecclesiæ minister humilis, et W. ejusdem ecclesiæ dictus decanus, venerabili abbati [Menatensis monasterii] et conventui ejusdem loci inobedientiam et rebellionis semitam declinare. Satis constat, quod precibus venerabilis amici nostri domini Claromontensis episcopi detulimus vobis in quantum potuimus, et adhuc, nisi instaret domini Cluniacensis instantia, qui in vobis et in ecclesia vestra subjectionis et obedientiæ jus reclamat, ei cuperemus deferre. Unde cum nobis de rebellione vestra et inobedientia plenius innotescat, nec possimus vobis deferre ulterius, nisi summi pontificis offensam vellemus incurrere, in eandem excommunicationis sententiam, qua vos absolvimus post præstitam juratoriam cautionem ut nostro pareretis mandato reduximus, vobis auctoritate apostolica nobis in hac parte commissa districtius injungentes ut ipsam excommunicationis et interdicti sententiam in vos et ecclesiam vestram latam inviolabiliter observetis, quandiu abbatem et ecclesiam Cluniacensem in adjudicata sibi quasi possessione duxeritis perturbandos. Ut autem fides certior habeatur rem taliter processisse, presenti cartæ in testimonium sigillum nostrum nos archiepiscopus Lugdunensis duximus apponi.