Charta qua Johannes, dominus Villæ Harduini, notum facit se, de assensu monasterii Cluniacensis, molendinum cum stagno juxta Merquericort ædificavisse.
Ego Johannes, dominus Villæ Harduini, notum facio tam presentibus quam futuris, quod ego, assensu domini abbatis Cluniacensis ecclesiæ et totius ejusdem capituli, quoddam molendinum cum stagno juxta Merquericort ædificavi, tali cum conditione inter me et abbatem apposita, quod illos duos campos, quos ipsi habent juxta molendinum hinc inde sitos, in ipsius ædificatione posuerunt, et quicquid ad supradicti stagni perfectionem esset opportunum, de terris scilicet, se promiserunt adimplere. Hoc autem superaddito, quod ego et uxor mea, dum vixerimus, molendinum cum supradictis possidebimus, ecclesia vero Sanctæ Margaritæ medietatem de proventibus stagni totius et molendini in omnibus recipiet. De duobus etiam campis ego et uxor mea unum modium bladi, scilicet medium grani et medium avenæ, ecclesiæ Sanctæ Margaritæ singulis annis persolvemus, et post decessum nostrum duorum, prædictum molendinum cum omnibus supradictis pertinenciis ad præfatam ecclesiam revertetur. Quod ut ratum habeatur, sigilli mei munimine roboratur. Actum hoc anno ab incarnatione Domini M.CC. nono, mense augusti.