Noverint omnes presentes et futuri, quod ego Odo, dux Burgundie, cruce signatus contra hereticos Albigenses, recordatus me contra Cluniacensem ecclesiam in multis deliquisse, donavi et concessi pro remedio anime mee domino Willelmo, venerabili abbati et conventui Cluniacensi, omnes homines quos habebam apud Floriacum, cum heredibus suis, et omnibus rebus et possessionibus eorum, sine contradictione et aliqua retentione, libere et pacifice ab ipsis jure perpetuo possidendos, nichil juris vel exactionis in ipsis hominibus retinens, salva custodia mea et gisto meo, quod singulis annis Floriaci pro hominibus et rebus suis ab antiquo nobis debetur. Preterea commendationem quam ab hominibus Givriaci et domus de Belna accipiebamus, et remisimus penitus et quittavimus, nolentes in aliquo venire contra cartam bone memorie patris mei Hugonis, ducis Burgundie, qua diligenter inspecta et audita cognovimus ex ejus tenore, quod dux Burgundie homines ecclesie Cluniacensis subjectos, sine mandato abbatis vel prioris Cluniacensis in commendationem accipere non debet. Ut igitur prefata donatio et commendationis quittatio et guerpitio, futuris temporibus inviolabiliter observentur, et ne Cluniacensis ecclesia ab aliquo heredum meorum seu prepositorum vel ballivorum valeat in posterum molestari, presentem paginam auctoritate sigilli nostri duximus confirmandam. Actum anno gratie M^o CC^o VIIII^o.