Litteræ Guichardi, domini Bellijoci, ad præpositos suos, super quitatione pedagiorum in omni terra sua monachis Cluniacensibus concessa.
Guicardus, dominus de Bellojoco, universis prepositis, omnibusque pedagiorum suorum receptoribus, ad quos presens scriptum pervenerit, salutem et dilectionem. Universitati vestre mando et districte precipio quatinus pannis, corduano, sive quibuscumque pellibus, vel quibuslibet aliis ad usum vestimentorum et calciamentorum Cluniacensi conventui necessariis, ubique per terram meam liberum et quietum transitum, sine omni questu et pedagio, remoto cujuslibet dilationis obstaculo, permittatis, ministris eorumdem pacem et tuicionem exhibentes.
(Au dos:) G. domini Bellijoci super quitatione pedagiorum; - [2e copie:] De quittatione pedagii per terram domini de Bellojoco.