Notum sit omnibus præsentes litteras inspecturis, quod ego R., humilis Moisiacensis abbas, tactis sacrosanctis evangeliis, juravi in præsentia venerabilis patris nostri domni Guillermi, Cluniacensis abbatis, stare præcise absque omni reclamatione mandato ipsius abbatis Cluniacensis, tam super renuntiatione abbatiæ Moisiacensis, quam super correctione et ordinatione, et super aliis querelis contra me propositis coram ipso. Hoc idem juraverunt socii nostri Robertus et Petrus, quantum in ipsis est, se servaturos. In cujus rei testimonium præsenti cartulæ sigillum nostrum apposui. Rogavimus etiam venerabiles viros H., de Caritate, et J., Sancti Martini de Campis, priores, et magistrum R., decanum Cluniacensem, et magistrum Johannem Galoni, canonicum Bituricensem, archidiaconum de Versena, et magistrum Aimonem, qui præsentes erant, ut litteris præsentibus sigilla sua apponerent, et ipsi rogatu nostro apposuerunt. Actum anno gratiæ M. CC. quarto decimo, mense februario.