Bulla Honorii papæ III, qua confirmat bullam Innocentii papæ III super electione prioris de Caritate.
Honorius, episcopus servus servorum Dei, dilectis filiis Giroldo abbati et conventui Cluniacensi, salutem et apostolicam benedictionem. Justis petentium desideriis dignum est nos facilem prebere assensum,
et vota que a rationis tramite non discordant, effectu prosequente complere. Eapropter, dilecti in Domino filii, vestris justis precibus inclinati, diffinitivam sententiam super electione ac institutione prioris de Caritate a felicis memorie I[nnocentio] papa, predecessore nostro, pro vobis justitia exigente prolatam, sicut in ejusdem predecessoris nostri litteris continetur, auctoritate apostolica confirmamus, et presentis scripti patrocinio communimus. Ad rei autem evidentiam pleniorem, sententiam ipsam presentibus de verbo ad verbum duximus inserendam, cujus tenor est talis: «Innocentius, etc.» Nulli ergo, etc. Si quis, etc. Datum Lateranni, idus octobris, pontificatus nostri anno primo.