Quoniam dignum est, ut per quem reges regnant in eo regnare videantur, religiosos viros pie et misericorditer confovendo, religiosa loca donationibus et beneficiis extollendo, eapropter nos Ferrandus, Dei gratia rex Castelle et Toleti, una cum domina Berengaria regina, genitrice nostra, terrestre regnum transitorium attendentes et celestis participes effici cupientes, ad cujus obtentum de hiis que transitorie possidemus, pauperes Christi amicos nobis et favorabiles facere desiderantes, pro remedio illustrissimorum progenitorum nostrorum, regis Aldefonsi et regine Alionoris, ut quibus in presenti regno dinoscimur succedere, in celis divina gratia associari mereamur, necnon et salute corporis et anime nostra et genitricis nostre facimus cartam donationis, concessionis et stabilitatis Deo et monasterio Cluniacensi, quod constructum est in proprio allodio predecessoris nostri Aquitanniæ Willelmi pii et vobis domno Geraldo instanti abbati et vestris successoribus, totique monachorum collegio ibidem Deo servientium, presenti et futuro, perhenniter valituram. Donamus itaque et perpetuo assignamus vice annua colligendos in redditibus salinarum nostrarum de Accentia trecentos aureos, de quibus vobis et quibuscunque ad capitulum convenientibus, una trium dierum generalis capituli, fiat procuratio conpetenter; mandantes et immutabiliter statuentes, ut quicunque dictos redditus salinarum de nobis tenuerit, dictos aureos teneatur vobis persolvere certis temporibus annuatim. Volumus autem et stabilimus, quod hoc factum nostrum baronum nostrorum consilio et approbatione roboratum inconcussum maneat et fideliter observetur. Si quis vero ex nostro vel alieno genere ausu temerario nostre donationis et concessionis privilegium infringere vel diminuere attemptaverit, omnipotentis Dei indignationem incurrat et eternis cruciatibus mancipetur, et ad terrorem illorum qui temporalia supplicia timent potius quam eterna, penam injungimus temporalem, ut pro violatione seu diminutione privilegii quinque milia aureorum regie parti persolvere teneatur et dampnum, quod vobis vel vocem vestram pulsanti super hoc intulerit, in dupplum restituat et emendet. Facta carta apud Burgos, XIII^a die mensis januarii, era M^a CC^a L. sexta, anno regni nostri primo. Ego rex F[errandus] regnans in Castella et Toleto, hanc cartam, quam fieri jussi, manu propria roboro et confirmo. Rodericus, Toletane sedis archiepiscopus, Hyspaniarum primas, confirmat. (Monogramme, en forme de roue, du roi Ferdinand, dans l'intérieur duquel on lit:) Signum Ferrandi regis Castelle. (Et autour de la roue:) Lupus Didaci de Faro, alferiz regis, confirmat. Gonzalfus Roderici, major domus curie regis, confirmat. Mauricius, Burgensis episcopus, confirmat. Tellius, Palentinus episcopus, confirmat. Geraldus, Secobiensis episcopus, confirmat. Rodericus, Segontinensis episcopus, confirmat. Garsias, Conchensis episcopus, confirmat. Melendus, Oxomensis episcopus, confirmat. Dominicus, Abulensis episcopus, confirmat. Dominicus, Placentinus episcopus, confirmat. Johannes, domini Regis cancellarius, abbas Sancti Anderii, confirmat. Comes Ferrandus confirmat. Rodericus Didaci confirmat. Alvares Didaci confirmat. Alfonsus Tellii confirmat. Rodericus Roderici confirmat. Johannes Gonzalvi confirmat. Suerius Tellii confirmat. Garsias Ferrandi, major domus domine regine, confirmat. Gonzalvus Petri, major merinus in Castella, confirmat. Dominicus de Soria, jussu cancellarii, scripsit.