Honorius, episcopus, servus servorum Dei, venerabili fratri C[onrado], episcopo Portuensi, apostolicæ sedis legato, salutem et apostolicam benedictionem. Cum in terra legationis tuæ multi sint, sicut accepimus, solo nomine regulares, per quorum perversitatem ecclesiæ in quibus consistunt fere penitus in spiritualibus et temporalibus sunt collapsæ, collocandi eos in aliis locis ad pœnitentiam peragendam, ac ordinandi easdem ecclesias de personis regularibus seu etiam secularibus, prout pensatis locorum et temporum circumstanciis videris expedire, liberam tibi concedimus, auctoritate præsentium, potestatem. Datum Viterbii, idibus decembris, pontificatus nostri anno quarto.