Ego Mathildis, comitissa Nivernensis, omnibus notum facimus, tam præsentibus quam futuris, quod nos, pro remedio animæ nostræ et Hervei, bonæ memoriæ condam comitis Nivernensis, et domini et mariti nostri, dedimus et concessimus ecclesiæ Beati Petri Cluniacensis, pro anniversariis nostris annuatim in ipsa ecclesia celebrandis, decem libras redditus cursualis monetæ in censa Dissisiæ post decessum nostrum annuatim in perpetuum percipiendas. Volumus siquidem et præcipimus, ut episcopus, qui pro tempore erit, ponat sententias excommunicationis in personas heredis aut successoris nostri et interdicti in terram ipsius, si contra donum istud ullo modo ire attemptaverit, nec ipsa relaxetur, quousque dictæ ecclesiæ de dicto redditu ad plenum fuerit satisfactum. Quod ut ratum permaneat, præsentes litteras fecimus sigilli nostri munimine roborari. Actum anno Domini M. CC. XXVI.