Charta qua Alix, ducissa Burgundiæ, notum facit Johannem de Nublens omnes querelas, quas contra ecclesiam Cluniacensem movebat, quittavisse.
Ego A[lix], nobilis domina, ducissa Burgundiæ, universis præsentes litteras inspecturis, salutem in Domino. Universitati vestræ notum facimus, quod cum nobilis domicellus Johannes de Nublens versus ecclesiam Cluniacensem quæstionem moverit super eo quod proponebat quendam burgensem Cluniacensem, videlicet Willermum de Bosco, convicia et graves injurias sibi intulisse, et super eo quod infra treucas captus fuerat et male tractatus, ut dicebat, tamdem venerabili episcopo Cabilonensi et quibusdam aliis probis viris mediantibus, compositum est in hunc modum: quod dictus Johannes præmissas querelas et omnes alias versus ecclesiam Cluniacensem vel ejus homines motas eidem ecclesiæ quitavit et remisit, et proinde ecclesiæ et villæ Cluniacensis hominibus et rebus eorum, et præcipue Duranno de Blanusco et omnibus aliis, qui ejus captioni interfuerunt, de se et de omnibus suis pacem in perpetuum tenendam in præsentia nostra juravit, salvo fundo terræ et jure suo. In cujus rei testimonium, præsentibus litteris sigillum nostrum apposuimus. Actum anno gratiæ M. CC. XXVI. Datum aput Belnam, sabbato ante dominicam qua cantatur Lætare Jerusalem.