Venerabili in Christo patri ac domino R[olando], Dei gratia Cluniacensi abbati, ejusque loci sacro conventui, W., prior, humilisque conventus Balmensis, salutem, obsequium et honorem. Cum dilectus in Christo Stephanus, abbas noster, nuper in fata concesserit, nos de vestra caritate, auxilio atque consilio plenarie confidentes, vobis humiliter supplicamus, quatinus sigillum nostrum, quod monachi vestri Romani Monasterii detinent et frangere negligunt, atque res ecclesiæ nostræ, scilicet duos equos, cupam argenteam, decem libras Stephanensium, atque alia mobilia, quæ sibi usurpare cupiunt, pietatis intuitu nobis reddere faciatis, ita quod de vestræ æquitatis beneficio valeamus unanimiter collaudare, et fraterna dilectio et indissolubilis societas quæ inter nos et vos permanet solidius confirmetur. Et quicquid vobis placuerit per latorem præsentium dignemini remandare.