Gregorius, episcopus, servus servorum Dei, dilecto filio abbati Cluniacensi, salutem et apostolicam benedictionem. Sacrosancta ecclesia, quam decet quicquid est reprehensibile evitare, sustinere alicujus compositionis prætextu non debet, ut in prejudicium libertatis ecclesiasticæ laici ultra sibi vendicent in ecclesiis quam jura permittunt, cum sic trahi compositionis compendium ad iniquum dispendium pateretur. In nostra sane proposuisti præsentia constitutus, quod super ordinatione prioris monasterii Sancti Pancratii ad Cluniacensem ecclesiam pertinentis, cum nobili viro comite de Varanna, patrono ipsius, quidam prædecessor tuus, de consensu capituli sui, ut asseritur, a triginta annis infra compositionem quamdam iniit juri contrariam, et ecclesiæ ipsi dampnosam, videlicet ut in optione sit ipsius comitis assumere ad prioratum dicti monasterii, Cluniacensi et de Karitate prioribus duntaxat exceptis, unum de duobus melioribus totius Cluniacensis ordinis, quos abbas duxerit nominandos; cujus compositionis prætextu monachi ejusdem monasterii de priore illud ordinari ab abbate Cluniacensi minime patiuntur, nec alium nisi qui ab eodem comite assumitur, modo prædicto volunt recipere in priorem. Propter quod priori et monachis prioratus prædicti contra Cluniacensem ecclesiam datur rebellionis materia, cum videant quasi per comitem de priore suum monasterium ordinari. Suppliciter ergo a nobis et humiliter postulasti, ut quia talis compositio de jure tenere non debet, cum secundum statuta canonica patroni consensus electioni faciendæ in collegiatis ecclesiis necquaquam requirendus existat, ordinandi prioratum eumdem, non obstante compositione prædicta, tibi deberemus concedere facultatem. Attendentes itaque hoc esse perniciosum exemplo et redundare in dispendium ecclesiasticæ libertatis, nos super hoc providere volentes, et amputare materiam monachis prioratus ejusdem contra Cluniacensem ecclesiam rebellionis calcaneum eligendi, tuis supplicationibus inclinati, devotioni tuæ præsentium auctoritate concedimus, ut dictum prioratum libere possis, non obstante compositione ipsa, sicut alios prioratus tibi subditos ordinare, denuncianda ordinatione facta patrono, ut suum, si voluerit, honestum impertiatur assensum. Nulli ergo omnino hominum liceat hanc paginam nostræ concessionis infringere vel ei ausu temerario contraire. Si quis autem hoc attemptare præsumpserit, indignationem omnipotentis Dei et beatorum apostolorum Petri et Pauli se noverit incursurum. Datum Perusii, VIII kal. novembris, pontificatus nostri anno secundo.