CCE: cartae cluniacenses electronicae
Database of the Charters of the abbey of Cluny (802-1300)

BB 4579     View  [Back]
Litteræ Stephani, prioris de Caritate, ad fratres Cluniacenses, de tribulatione ecclesiæ de Caritate propter discordiam inter eamdem ecclesiam et monasterium Cluniacense.
Viris venerabilibus, religiosis et honestis, priori Cluniacensi, priori claustrali et consociis in ordine, frater S[tephanus], prior Karitatis, salutem et obedientiam in omnibus sine differentia præparatam. Noscat vestra benignitas, quod super illud quod nuper eventum est in ecclesia Cluniacensi, noster plus nimio turbatur animus. Sed quoniam illud quod factum est non potest non fieri, nec ad voluntatem instantium emendari, inde est quod paternitati vestræ notificamus, quod quamdiu dominus Rolandus Cluniacensem rexit ecclesiam, nullum prorsus contra S., condam de Karitate priorem, ad curiam Romanam transmisimus defensorem, eo quod ipse dominus Rolandus, chamerarius Karitatensis, tanquam suam propriam defendere cupiebat. Et quoniam propter ipsius mutationem versa est cithara nostra in luctum, dilectionem vestram modis omnibus quibus possumus exoramus, quatinus per nuntios vestros, si quos ad curiam transmiseritis, domino B[artholomæo], electo Cluniacensi, suggerere faciatis, ut ecclesiam de Karitate in tanta tribulatione positam, tanquam suam propriam non deserat indefensam. Et quoniam tantus labor non potest sine magna missione perfici, nos, qui sui sumus, et vestræ semper obedientes voluntati, sumptus et missiones, quas pro causa Karitatis fecerit, voluntati ipsius parati erimus resarcire. Super hoc vero benignitatem ipsius amore Dei et nostrarum precum interventu attentius rogare dignemini, ut ipse super hoc tantam imponat industriam, ut ad honorem sui et ecclesiæ Cluniacensis atque Karitatis conveniat et nostri, qui semper fuimus, sumus et erimus ecclesiæ Cluniacensis honorem pro posse nostro præ omnibus firmiter observantes. Et super hoc quod ex parte nostra vobis lator præsentium dixerit, fideliter credatis.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung