Noverint omnes presentes pariter et futuri, quod ego Poncius Imberti, miles, in compensatione dampni dati domui et ecclesie de Grazac a Vassalo de Beljoc, fratre meo, et pro anima ipsius Vassalli, domui supradicte et tibi Pagano, priori dicte domus, pro eadem recipienti, dono sine retentione et revocatione, Poncium Palai, hominem meum, et qui[c]quid juris habeo in homine supradicto, vel habere possem, tam in ipsum quam in heredibus ejusdem Pontii, promittens dicto priori, pro eadem domo recipienti, quod donationem istam firmam semper habebo et tenebo, et non veniam contra, aliquo jure vel aliqua ratione, si Deus me adjuvet, et hec sancta Dei euvangelia, que manu tango. De mandato et voluntate mea Gilis, Maletus et Jocerandus, filii mei, approbaverunt donationem supradictam, et tactis sacrosanctis euvangeliis, juraverunt eandem donationem semper firmam habere et non contravenire ratione minoris etatis vel aliqua alia ratione. Item Berauda, uxor mea, huic donationi interfuit, et eam laudavit et approbavit. Sciendum itaque, quod dictus prior, pro dicta domo et nomine ejusdem, quitavit animam ejusdem Vassalli et omnes homines de mundo, de hiis omnibus quas petere possent ratione dampni dati dicte domui a Vassallo supradicto, et nichilominus, pro dono supradicto, tam ego quam uxor et filii mei ab ipso priore habuimus VII libras et duos solidos Viennenses. Actum apud Beljoc, anno Domini M^o CC^o XXVIIII, mense maii, in presentia Hugonis de Salzac, Poncii de Lapte, et Jarento (?), et Bodo {corr: Bodonis} presbiteri, Vachier, Artaudi de Veros, Aviti et Albos de Grasac, Bo. de Valle, et Imberti clerici, et Iterii de Lapte. Ut autem super hiis nulla in posterum dubietas oriatur, est presens carta sigillorum dicti Poncii Imberti et ipsius prioris munimine roborata.