CCE: cartae cluniacenses electronicae
Database of the Charters of the abbey of Cluny (802-1300)

BB 4584     View  [Back]
Charta qua Stephanus, prior Silviniacensis, notam facit compositionem factam inter Paganum de Petraclausa et ecclesiam Cluniacensem, super morte Jacobi, filii dicti Pagani.
Universis præsentes litteras inspecturis, Stephanus, prior Silviniacensis, tenens castrum Berciaci, salutem in Domino. Universitati vestræ notum facimus, quod super querela quam Paganus de Petra Clausa et Guido, ejus filius, et Petrus de Sancto Laurentio, gener ejusdem Pagani, versus ecclesiam Cluniacensem moverant occasione occisionis Jacobi, filii dicti Pagani, et super aliis querelis quas dictus Paganus et alii prænominati contra eamdem ecclesiam Cluniacensem habebant vel habere poterant, item super querelis quas ecclesia Cluniacensis versus eosdem occasione forefactorum proinde commissorum habebat vel habere poterat, in nos fuit compromissum juramento hinc et inde præstito et fidejussoribus datis: ex parte ecclesiæ, domino Joceranno de Marziaco, milite; Duranno, præposito de Blanusco, et Gaufrido, ejus fratre; ex parte Pagani et suorum, domino Maiolo de Vinceles, domino Guigone de Brueria, domino Hugone de Chaintrie, militibus, et Guigone de Vinceles, domicello, sub hac forma, quod quicquid super præmissis querelis dixerimus, partes sub juramentis præstitis et fidejussoribus datis tenentur observare, et si Paganus vel sui a dicto nostro resilierint, vel contra venerint, fidejussores pro eo dati juramento tenentur apud Berziacum tenere ostagia, donec de dampnis et deperditis proinde factis ecclesiæ Cluniacensi plenarie fuerit satisfactum. Idem de fidejussoribus ecclesiæ Cluniacensis, si a dicto nostro præsumserit resilire. Nos vero, auditis rationibus partium, de consilio domini Maioli de Vinceles et domini Joceranni de Marziaco, ad hoc a partibus deputatis, et aliorum militum fidelium nostrorum, dictum nostrum pronuntiavimus in hunc modum: quod prænominati Paganus, Guido, filius ejus, et Petrus de Sancto Laurentio ecclesiam Cluniacensem de querela occasione dicti Jacobi occisionis et aliis querelis quas versus ecclesiam Cluniacensem tunc habebant vel habere poterant quictarent præcise et absolute, et pacem proinde in perpetuum tenerent et observarent ecclesiæ Cluniacensi, hominibus et rebus ejusdem, exceptis illis qui occisionis dicti Jacobi culpabiles asseruntur, videlicet Naaul, Johanne Chanuto, Vincentio la Gayte, et Petro Larberester, et octo aliis nominandis; de quibus octo si quis ad cognitionem curiæ nostræ pugnare vel excussare se poterit, immunis erit et in pace ista includetur, alioquin a pace excluditur. Et prænominatos quatuor ac alios qui se pugnare vel excussare ad curiam nostram non poterunt, ecclesia Cluniacensis non tenebit nec receptabit. Item ecclesia Cluniacensis pro dicto Jacobo occiso quoad divinum officium faciet quasi pro uno fratre monacho defuncto, et insuper receptabitur. Item ecclesia Cluniacensis pro dicto insuper sexaginta et quindecim libras Cluniacenses dicto Pagano et suis dabit et refundet. Et Paganus et nominati hanc pacem coram omnibus querelantibus publice debet protestari et inhibere ac contradicere ac bona fide disturbare, ne ecclesia Cluniacensis occasione præmissarum querelarum de cetero molestetur, et requirere a priore Sancti Petri Masticonensis, ut super pace ista ecclesiæ Cluniacensi litteras suas tradat et concedat. Hoc dictum nostrum ecclesia Cluniacensis, pro sua parte, Paganus et sui, pro sua parte, sub juramentis præstitis et obligatione fidejussorum acceptaverunt et approbaverunt. In cujus rei testimonium, sigillum nostrum præsentibus duximus apponendum. Actum anno Domini millesimo CCo vicesimo nono, mense augusti.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung