Charta qua Jocerannus, dominus Branceduni, notum facit pacem et concordiam inter se et ecclesiam Cluniacensem super captione Landrici de Branceduno reformatas fuisse.
Ego Joscerannus, dominus Branceduni, notum facio omnibus presentes litteras inspecturis, quod de omnibus causis, controversiis, contentionibus et querelis quas moveram vel movebam, habebam vel
habere poteram vel movere contra ecclesiam vel villam Cluniacensem cum pertinentiis earumdem, occasione injurie michi vel hominibus meis illate super captione sive detentione Landrici de Branceduno, militis, tam pro me quam pro omnibus meis, excepto dicto Landrico, inter me et dictam ecclesiam sive villam cum pertinentiis suis, sive singulos aut quoslibet eorundem, mediantibus venerabili patre domino B., episcopo Quinque Ecclesiarum, germano meo, et nobili viro domino meo Johanne, comite Cabilonensi, bona pax est et firma concordia reformata, et tam pro me, quam pro hominibus meis remisi eidem ecclesie sive ville, cum pertinentiis earumdem, quidquid juris, contentionis, controversie, sive actionis ego vel mei habebamus vel habere etiam poteramus contra villam vel ecclesiam memoratas, Petro de Fonte et Robleto dumtaxat exceptis, qui in eo statu in quo modo sunt, donec de eis compositum fuerit, permanebunt. De dicto vero Landrico ita est ordinatum, quod predictus dominus meus J., comes Cabilonensis, debet inquirere de hiis de quibus reus a burgensibus dicebatur, et inquisitione premissa, ipsius comitis stabitur voluntati. In cujus rei securitatem, presentes litteras sigilli mei appositione munivi. Actum anno Domini M
o CC
o XX
o nono, die mercurii proxima post octabas Purificationis beate Marie.
(Au dos:) De quadam compositione domni Jocerandi.