Litteræ quibus L., subprior de Pontida, abbatem Cluniacensem rogat ut priorem eidem monasterio præficiat.
Reverendis patribus et dominis domino Stephano, abbati, totique
sacro conventui Cluniacensi, frater L., supprior, totusque conventus monasterii de Pontida, filii eorum humiles ac devoti, usque ad mortem obedientiam promptam pariter et devotam. Cum super instituendo sive præficiendo nobis priore nec nominationem, nec electionem habeamus, immo ipsius institutio ac destitutio, electio, nominatio, ac omnimoda ordinatio, sicut cognovimus et sincere recognoscimus, ad solius vestræ voluntatis arbitrium, domine abbas, plene ac libere noscitur pertinere, unde ad vestram, sicuti tenemur, recurrimus paternitatem, tanquam devoti obedientiæ filii, ut nobis de priore provido, discreto et honesto provideatur, reverentiæ vestræ cum devotione lacrymabili supplicantes, quatinus, cum jam moræ dispendium non mediocriter sit dampnosum, desolationi nostræ pio compassionis animo condolentes, talem nobis priorem præficere dignemini, cujus discretio sive prudentia nobis et ordini Cluniacensi proficiat ad honoris materiam et augmentum, et per cujus industriam ecclesia nostra de Pontida, tam in spiritualibus quam temporalibus, gratum possit percipere incrementum, credentes ea indubitanter quæ Johannes, frater noster, lator præsentium, ex parte nostra vestræ intimaverit sanctitati.