Ego Jocerannus Grossi, dominus Brancionis et castellanus domini Reginaldi in Burgundia, notum facio universis præsentem paginam inspecturis, quod nobilis Guido de Serciaco recognovit in præsentia mea se accepisse in casamento et feodo omnia quæ habet et possidet vel alter ab ipso possidet, vel nomine ipsius dicitur possidere vel habere a barra Sarciaci usque ad portas villæ Cluniacensis a domino Stephano de Berziaco, Cluniacensi abbate, et inde fecit homagium, et suis successoribus abbatibus in perpetuum facere tenetur. In cujus rei testimonio, præsentem cartam ad instantiam prædicti Guidonis tradidi præfato Stephano abbati sigilli mei munimine roboratam. Actum Cluniaci, feria quarta infra octabas Ascensionis Domini, anno Domini M^o CC^o XXX^o II^o, mense maio.