Sanctissimo patri ac domino Cluniacensi abbati, frater Guido, subprior totusque conventus humilis Novi Monasterii Pictavensis, salutem et tam debitam quam devotam domino patri obedientiam. Sanctitati vestræ notum fieri volumus, quod die Dominica post Purificationem beatæ Virginis Mariæ, una cum domino Orrico, comdam abbate nostro, in capitulo nostro simul convenimus, et G., venerabilis prior Sancti Eut[r]opii Sanctonensis et camerarius vester in Pictavia, litteras vestras nobis ex[h]ibuit sub hac forma:

«Venerabili et karissimo fratri nostro G., priori Sancti Eutropii Sanctonensis et chamerario nostro in Pictavia, frater Stephanus, humilis abbas Cluniacensis, salutem, gratiam et benedictionem. Mandamus vobis, quatinus si venerabilis in Christo et karissimus frater noster Orricus, abbas Sancti Johannis Monasterii Novi Pictavensis, aliqua necessitate compulsus, abbatiæ suæ voluerit resignare, resignationem illius recipiatis, dantes illius loci conventui auctoritate nostra eligendi juxta tenorem Cluniacensis ecclesiæ privilegiorum, et ita quod inde nullum præjudicium fiat ecclesiæ privilegiorum, et ita quod inde nullum præjudicium fiat ecclesiæ Cluniacensi. Mandamus etiam vobis quod si ita est, de redditibus dictæ abbatiæ dicto abbati competenter et honeste quamdiu vixerit in necessariis sibi auctoritate nostra provideri faciatis.»

Quarum litterarum auctoritate prædictus abbas noster maxima necessitate compulsus, et inpotentia sui corporis exigente, propria voluntate in præsentia vestri camerarii jamdicti administrationi ecclesiæ suæ resignavit. Quo facto, nobis data a camerario vestro licentia eligendi, in septem fratres nostros bonæ vitæ et oppinionis vota nostra unanimiter transtulimus, qui jurati ecclesiæ nostræ de pastore idoneo providerint secundum quod eis secundum Deum videbitur expedire, et nos omnes fidem dedimus, volentes dare pacem ecclesiæ, quod electionem ab illis factam ratam et firmam sine reclamatione aliqua haberemus. Cum vero postmodum illi septem de electione tractassent, in venerabilem fratrem nostrum Fulconem, præpositum ecclesiæ nostræ, unanimiter consenserunt, et eumdem in pastorem ecclesiæ nostræ elegerunt. Quam electionem nos omnes unanimiter approbavimus et ap

probamus. Unde sanctitati vestræ in quantum possumus supplicamus humiliter et devote, quatinus prædictum electum nostrum bonum virum et honestum, quem vobis per karissimos in Christo fratres Guillermum, armarium, et J., cellerarium ecclesiæ nostræ, et per patentes litteras præsentamus, recipiatis liberaliter et benigne, et electionem illius, si placet, dignemini confirmare, scientes pro certo, quod nos in ecclesia nostra aliquem habere non credimus, qui ad regimen ecclesiæ nostræ tam sit necessarius et honestus. Bene et diu valeat in Domino sanctitas vestra. Datum die sabbati post festum beati Mathiæ apostoli, anno Domini M^o CC^o XXX^o tertio.