Universis præsentes litteras inspecturis, ego Humbertus, dominus Bellijoci, salutem. Noverit universitas vestra, quod ego teneor meis sumptibus abbati et conventui Cluniacensi tradere litteras archiepiscopi Lugdunensis de observandis pactionibus inter me et dictos abbatem et conventum Cluniacensem habitis super hac accollectione et associatione quam ipsi fecerunt michi in villa sua de Tossoy et pertinenciis ejusdem; in quibus litteris debent contineri conventiones prædictæ, sicut in meis litteris, quas super hoc sæpedictis abbati et conventui tradidi, plenius continentur. Hoc adjuncto, quod si me vel aliquem heredum meorum dictis conventionibus in aliquo contingeret de cetero contraire, ipse archiepiscopus, requisitus a dictis abbate et conventu, me et terram meam supponeret interdicto, et hoc per litteras suas promittat eisdem. Actum et sigillo meo confirmatum XI kal. maii, anno Domini M^o CC^o XXX tertio.