Willelmus, Dei gratia Cabilonensis episcopus, nobili viro Petro, domino d'Escrille, et universis presentes litteras inspecturis, salutem in Domino. Universitati vestre significamus, quod nobiles viri Willelmus, dominus de Digonia, Anselmus de Peureria, Gualterius de Salviangiis, milites, in nostra presentia constituti, in testimonio veritatis confessi sunt coram nobis, et ad hoc vocati, quod Willelmus de Rossillon, domicellus, quondam frater noster, o domne Petre, in extrema positus voluntate, in elemosinam dedit Cluniacensi monasterio decem solidos Cluniacenses censuales super tenementum matris sue annuatim de cetero in perpetuum eidem monasterio vel ejus certo nuntio persolvendos. Et hoc vobis presentibus litteris intimamus. Datum anno Domini M^o CC^o XXX^o III^o, mense decembri.