Charta qua Hugo, dux Burgundiæ, confirmat conventiones factas inter monasterium Cluniacense et servientem suum Alvernaz, super domibus de Blanziaco et de Montrical.
Ego Hugo, dux Burgundiæ, per testimonium præsentium litterarum omnibus notum facimus, quod cum venerabilis in Christo abbas et conventus Cluniacensis domos suas de Blanziaco et de Montrical dilecto et fideli servienti nostro Alvernaz commisserint toto tempore vitæ suæ pacifice possidendas, idem Alvernaz, juramento in nostra præsentia corporaliter præstito, promisit bona et jura dictarum domorum bona fide integre conservare, et quod domus illæ, post ejus decessum, omni debito liberæ, absque contradictione cujuslibet, cum omnibus acquisitionibus, melioramentis et incrementis ibidem factis ad Cluniacensem ecclesiam revertantur. Actum anno Domini Mo CCo XXXo III, mense marcio.