Universis præsentes litteras inspecturis, Robertus, archipresbyter Viriseti, salutem in vero salutari. Universitati vestræ notum facimus, quod cum venerabilis in Christo Oddo, prior Cluniacensis, intuitu pietatis recipisset in monachum et in fratrem Cluniacensem Petrum, filium Helyæ de Lordono, cum ætatem legitimam attingerit, regulariter ad vestiendum, dictus Helyas hac benignitate inductus, ob remedium animæ suæ et animæ fratris sui, magistri Johannis ac parentum et antecessorum suorum, dedit et contulit in helemosinam donatione inter vivos dicto domino Oddoni, priori, et Cluniacensi ecclesiæ in perpetuum duas domos suas in vico d'Arvi, ante domum Hugonis Carbonelli sitas, cum appendiciis earundem; item clusum suum de Crotauz, prata et omnes alias possessiones, census et jura quæ versus Lordonum habebat, et quicquid juris, quicquid rationis habebat vel habere poterat sub dominio villæ Cluniacensis et castellania de Lordono vel alias tam circiter quam infra. Et de præmissis possessionibus, rebus et juribus Cluniacensi ecclesiæ collatis idem Helyas se devestiens, dominum O., priorem, et ecclesiam Cluniacensem per ipsum sasivit et investivit. Cujus Helyæ liber[ali]tatem et devotionem erga Cluniacensem ecclesiam præfatus O., prior, attendens, eidem in recompensationem dedit et refudit XXX libras Turonenses et vinginti libras Cluniacenses; de quibus in nostra præsentia idem Helyas confessus est sibi fuisse plenarie satisfactum. In cujus rei testimonium, sigillum nostrum ad instantiam partium præsentibus duximus apponendum. Actum anno Domini M^o CC^o XXX^o tertio, mense marcii.