Universis Christi fidelibus, ad quos præsentes litteræ pervenerint, H[aimo], Dei gratia Matisconensis ecclesiæ minister humilis, salutem in vero salutari. Universitati vestræ notum facimus, quod cum controversia verteretur inter ecclesiam Cluniacensem, ex una parte, et Hugonem de Petra Campi, ex altera, super morte Johannis Barnesse, et guerra proinde mota, ac dampnis et injuriis proinde mutuo illatis, tamdem de utriusque partis amicorum consilio pax et compositio intervenit in hunc modum: Quod Hugo de Petra Campi ecclesiæ Cluniacensi in capitulo, et Petro Barnesse merciam clamavit super morte dicti Johannis Barnasse, patris ejusdem Petri, et deduxit ac negavit quod ipsum Johannem non inquirebat persequendo, sed fortuitu invenit, et quod non animo interficiendi ipsum invasit vel percussit, set ut ipsum caperet, et hoc tanquam iratus. Unde ratione emendæ pro anima ejusdem Johannis promisit et tenetur centum missas facere celebrare, et Petrum Barnesse et suos super omnibus injuriis et dampnis ratione vel occasione guerræ sibi et suis illatis quittavit libere et absolute, et promisit quod deinceps Petrum Barnesse et suos in bona pace et fideli amore de se et suis tenebit, habebit et pro posse suo conservabit. Petrus vero Barnesse eisdem Hugoni et suis mortem patris sui condonavit et quittavit, et omnem rancorem precise remittens, ad pacis obsculum eundem admisit; et hoc tam pro se quam pro suis de cetero esse firmum et stabile promisit. Item dictus Hugo de Petra Campi super injuriis et dampnis ratione et occasione prædictæ guerræ sibi et suis illatis pro se et suis ecclesiam Cluniacensem et suos quittavit libere et absolute. Et pro emenda mortis Johannis Barnesse et dampnorum ecclesiæ Cluniacensi illatorum dedit, concessit et quittavit ecclesiæ Cluniacensi quicquid possessionis, quicquid juris, quicquid rationis possidet, habet, aut possidere, habere vel reclamare potest nunc temporis in villa Sancti Ypoliti, infra fossata, et etiam quod de vercheria sua et de clauso vineæ in excisura fossatorum cadet et obveniet, et quod infra fossata continebitur, ecclesiæ Cluniacensi dedit, concessit, quittavit in perpetuum libere et absolute. Ecclesia vero Cluniacensis omnes injurias, omnia dampna et deperdita quæ tam ratione mortis Johannis Barnesse, quam occasione guerræ sustinuerat, pro se et suis dicto Hugoni de Petra Campi et suis in perpetuum bona fide quittavit et remisit, et Robertum de Aynai occasione guerræ occisum super injuriis et dampnis quæ sibi intulerat, quittavit et absolvit, promittens quod cum sibi constiterit ipsum Robertum alias esse absolutum, in capitulo Cluniacensi eundem absolvi facient et pro ipso præcipient fieri orationes. Hæc omnia superius expressa Hugo de Petra Campi, tactis sacrosanctis evangeliis, juravit pro se et suis in perpetuum firmiter tenere et inviolabiliter observare. Et nos ad preces et instantiam ejusdem Hugonis, ad majorem rei certitudinem, præsentes litteras ecclesiæ Cluniacensi tradidimus sigilli nostri munimine roboratas. Actum die martis proxima ante festum beatæ Mariæ Magdalenæ, anno Domini M^o CC^o XXX^o quarto.