Litteræ B., prioris Sancti Martini de Campis, ad Cluniacenses fratres, de excusatione pro absentia sua a capitulo generali.
Reverendis patribus ac dominis in Christo dilectissimis O. priori totique sacro conventui Cluniacensi, frater B., humilis prior Sancti Martini de Campis, salutem et omnimodam obedientiam cum omni obsequio et honore. Quoniam gravissima proprii corporis infirmitate detenti ad generale capitulum accedere non valemus, sanctitatem vestram totius cordis affectu humiliter exoramus, quatinus absentiam nostram hac vice habere dignemini excusatam, preces affectuosas pro nobis apud altissimum effundentes.