Guillelmus, Dei gratia Cabilonensis ecclesiæ minister humilis, universis præsentes litteras inspecturis, salutem in Domino. Universitati vestræ notum facimus, quod constitutus in præsentia nostra Hugo de Petra Campi, domicellus, promisit et tenetur quod ipse abbati et ecclesiæ Cluniacensi decimam quam habebat apud Aynart et medietatem decimæ quam habebat apud Contremblem ab eodem Hugone prædictis abbati ac ecclesiæ Cluniacensi titulo pignoris obligatas, bona fide garantiet et defendet. Et si forte (quod absit!) aliquis contravenire attemptaverit, idem Hugo se opponet et deffendet, et eamdem decimam de Aynart cum medietate dictæ decimæ de Contremblem ab eisdem abbate et ecclesia Cluniacensi secundum conventiones inter ipsos habitas in bona pace et tranquilla teneri faciet et haberi. Et pro hoc attendendo et tenendo ac inviolabiliter observando erga dictos abbatem et ecclesiam Cluniacensem, dominum Jocerannum de Nantum, militem, usque ad quadraginta libras Cluniacensis monetæ coram nobis constituit fidejussorem. Ad quam summam pecuniæ se astrinxit, fide interposita, coram nobis præfatus miles, et promisit per eamdem fidem præstitam se dictis abbati ac ecclesiæ Cluniacensi soluturum, vel apud Cluniacum, ad requisitionem dicti abbatis vel mandati sui, ostagium tenere donec dicta pecunia ipsis abbati ac ecclesiæ Cluniacensi solveretur, si præfatum Hugonem deficere contingeret in aliquo de præmissis. In cujus rei testimonium, ad instanciam et peticionem dictorum Joceranni et Hugonis, præsentibus litteris sigillum nostrum duximus apponendum. Datum apud Cluniacum, anno gratiæ M^o CC^o XXX^o quarto, mense marcii.