Magister Willermus, officialis Masticonensis, universis præsentes litteras inspecturis, salutem in Domino. Noveritis quod præpositus de Oysellis, in nostra præsentia constitutus, dedit Deo et ecclesiæ Cluniacensi in perpetuam elemosinam medietatem condaminæ quæ [est] apud Amuniacum et inter Amuniacum et grangiam de Sarceyo, quæ condamina vocatur Vetus Condamina, cujus condaminæ alia medietas erat ecclesiæ Cluniacensis. In cujus rei testimonium, ad petitionem dicti præpositi, sigillum curiæ Masticonensis præsentibus litteris duximus apponendum. Datum anno Domini M. CC. XXX quinto, mense julio.