Abbas et prior Atthanacenses et cantor Sancti Pauli Lugdunensis, exequutores a domino papa delegati, universis presentes litteras inspecturis, salutem in Domino. Noveritis, quod cum a domino papa Gregorio recepissemus in mandatis, quod exequutioni mandaremus sententiam diffinitivam quam venerabilis pater Henricus bone memorie, Albanensis episcopus, apostolice sedis legatus, pro venerabilibus viris abbate Cluniacensi et priore et conventu Silviniacensibus tulerat contra quosdam presbyteros et clericos de Silviniaco, qui se confratres sive congregationem capelle Beate Marie Silviniacensis appellabant, super eo quod iidem presbyteri et clerici in eadem capella, que cum pertinenciis suis pertinet ad ecclesiam Silviniacensem, invitis abbate Cluniacensi et priore et conventu Silviniacensibus, divina celebrabant, ibidem dicentes jus aliquid se habere, et in eadem capella volebant sive contendebant se esse congregationem sive confreriam, illi qui confratres se appellabant, prout in litteris, sigillo dicti legati sigillatis, diligenter inspeximus contineri; nos, juris ordine servato per omnia, excommunicationis sententiam tulimus in ipsos presbyteros et clericos qui confratres sive congregationem se dicebant, pro eo quod contra dictam sententiam temere venientes, dictos abbatem Cluniacensem et priorem et conventum Silviniacenses multipliciter molestabant, et post, cum ipsi obstinato animo per annum et amplius in eadem sententia perdurassent, in ipsos et in complices eorum duximus aggravandam justicia exigente. Tandem predicti presbyteri, qui confratres se appellabant, omnes et singuli, videlicet: Bonusamicus Segnerohc, Bartholomeus Magnyrs, Guillermus Bers, Symon Ligyrs, Petrus de Chona, Laurencius Boyssuns, Petrus Mazelyrs, Guillermus de Boquestre, confessi fuerunt ex certa scientia et spontanea voluntate, in jure, die assignata coram nobis, se aliquid juris nec habere, nec habuisse super querela supradicta mota inter ipsos ex una parte, et dictos abbatem Cluniacensem et priorem et conventum Silviniacensem ex altera. Et si quid juris in illa confreria sive congregatione et in dicta capella et pertinentiis et acquisitis ejusdem et celebratione divinorum in eadem capella habebant vel habuerant vel quoquo modo habere poterant, ratione confrerie sive congregationis vel alterius cujuslibet modi, totum ex certa scientia et spontanea voluntate quittaverunt, guerpiverunt, remiserunt, renuntiaverunt in perpetuum abbati Cluniacensi et priori et conventui Silviniacensibus, promittentes predicti presbyteri omnes et singuli, qui confratres se dicebant, quod nunquam de cetero in dicta capella seu in pertinentiis et a[c]quisitis ejusdem, aliquid juris reclamabunt per se vel per alium sive alios, nec venient de cetero per se vel per alium sive alios contra dictos abbatem Cluniacensem et priorem et conventum Silviniacenses super querela superius nominata. Renuntiaverunt insuper, omnes et singuli supradicti, qui confratres se appellabant, ex certa scientia et spontanea voluntate, beneficio restitutionis, doli exceptioni et in factum et quod metus causa omnique auxilio juris canonici et civilis et quod contra dictam quitationem non se opponent de cetero. Que omnia attendere et observare et non contravenire predicti omnes et singuli, qui confratres se appellabant, tactis sacrosanctis evangeliis ex certa scientia et spontanea voluntate abbati Cluniacensi et priori et conventui Silviniacensibus in nostra presentia juraverunt. In cujus rei testimonium, ad petitionem dictorum Boniamici Seygnerohc, Bartholomei Magnyr, Guillermi Ber, Symonis Ligyr, Petri de Chona, Guillermi de Boquestre, Laurentii Boyssun, Petri Mazelyr, sigilla nostra presentibus litteris duximus apponenda. Actum Lugduni, anno Domini millesimo ducentesimo tricesimo sexto, in crastino apostolorum Philippi et Jacobi.