Litteræ Gregorii papæ IX, quibus confirmat reformationes in monasterio Balmensi ab archiepiscopo Bisuntinensi factas.
Gregorius, etc. Dilectis filiis ... decano capellæ ducis Divion. etc. ... archidiacono Flaviniacensi, Lingonensis et Æduensis diocesum, salutem, etc. Dilecti filii ... abbas et conventus Balmensis, ordinis Sancti Benedicti, transmissa nobis petitione, monstraverunt quod cum bonæ memoriæ N., archiepiscopus Bisontinus, tam auctoritate nostra quam sua, causa visitationis, accessisset ad idem monasterium diocesanum sibi lege subjectum, P., tunc abbatem ejus, exigentibus culpis suis, ab ejus regimine prorsus amovit, cumque idem conventus dictum S. in abbatem sibi canonice ac concorditer elegissent, confirmavit electionem hujusmodi et munus ei benedictionis impendit. Præterea cum quidam de monachis dicti monasterii se a communi consortio, quoad dormitorium et refectorium, pro suæ voluntatis arbitrio sequestrarent, super hiis et aliis quædam ibi statuta salubria edidit et honesta, præcipiens inter cetera, ut in monasterio residentes simul in cummuni refectorio comedant, et jaceant in uno dormitorio, illis exceptis quos infirmitas vel aliqua causa rationabilis excusabit. Quæ dicti abbas et conventus apostolico roborari munimine petierunt. Volentes igitur, ut quæ ab ecclesiarum prælatis provide statuuntur debitam obtineant firmitatem, discretioni vestræ per apostolica scripta mandamus, quatinus statuta præmissa, sicut rite et sine pravitate aliqua facta sunt, per censuram ecclesiasticam, appellatione postposita, faciatis firmiter observari. Datum Interamnæ, IIII
o idus junii, pontificatus nostri anno decimo.