Ego J., dominus Branciduni, notum facio universis præsentes litteras inspecturis, quod cum dominus Stephanus, prior de Crepeio, domino Dalmacio l'Ungre quatraginta libras Cluniacensis monetæ acomodari fecisset, dictus Dalmacius promisit prænominato Stephano, quod singulis annis, infra obtabas beati Martini hiemalis, ducentos bichetos bladi, videlicet centum bichetos, de quibus quinquaginta erunt frumenti, et alii quinquaginta siliginis, alii vero centum erunt avenæ, pro solucione dictæ pecuniæ ei pacifice persolvet, donec de prædictis quatraginta libris ei plenarie fuerit satisfactum. Memoratus vero Stephanus prædictum bladum servare debet usque ad instantem quatragesimam. Et tunc retinebit illud secundum quod valebit in illo tempore ad marcatum. Pro hac autem convencione fideliter attendenda, prædictus Dalmacius prænominato Stephano fidejussores dedit, videlicet archipresbyterum de Roceio, dominum Achardum de Massiaco, dominum Jocerannum de Nantun, et Johannem Pagani, servientem meum. In cujus rei memoriam, præsentes litteras ei tradidi sigilli mei munimine roboratas. Actum anno Domini M^o CC^o XXX^o sexto.