In nomine Domini nostri Jesu Christi, amen. Quia labilis est memoria hominum et omnium habere memoriam pocius est divinitatis quam humanitatis, ideo perpetuitate scripturæ debet muniri quod per processum temporis posset anullari. Eapropter nos Jocerannus Grossus, dominus Branceduni, per præsentes litteras notum facimus universis, quod nos scientes et prudentes et spontanea voluntate vendidimus et tradidimus pro precio mille quingentarum marcharum argenti et quadringentarum librarum Divionensium, pro laudationibus seu drueleriis et pro villa de Bello Monte et domo, cum omnibus juribus et appendiciis ejus, Cabilonensis diocesis, et pro grangia Sancti Desiderii, cum omnibus juribus et pertinenciis seu appendiciis, exceptis decimis, ecclesiis et spiritualibus, viris religiosis et in Christo karissimis, domino Hugoni venerabili abbati Cluniacensi, ejusque successoribus et conventui ejusdem ecclesiæ Cluniacensis, castrum nostrum de Bonteavant et villam de Brey et de Contuberto cum omnibus juribus et pertinentiis præsentibus et futuris, ipso domino abbate recipiente possessionem et dominium pro se et successoribus ejus et ecclesia Cluniacensi, et quicquid habuimus, tenuimus vel possedimus aliquo tempore, habemus, tenemus vel possidemus vel quasi per nos vel per alium vel habere potuimus vel possumus quoquomodo in terris, hominibus, redditibus, nemoribus, aquarum decursibus, pratis, pascuis, viis, semitis, consuetudinibus, usagiis, gardis, justiciis, feodis, servitutibus, et in dictum dominum abbatem et ecclesiam Cluniacensem omnem possessionem quam habuimus, [possedimus vel quasi, aut alius nomine nostro, et omne dominium transtulimus et generaliter omnia que habuimus], habemus vel habere possumus aliquo modo per nos vel per alium a banno de Cluniaco quod est prope Varengias, usque ad aquam de Gradona, et postea usque ad aquam eandem, usque ad Chaselles cum ipsa aqua et sicut ducitur villa de Ly a capite territorii versus Brancidunum et versus Usseles cum territorio ipsius villæ et pertinenciis ejus usque ad territorium vallis de Blanos subtus Sanctum Romanum, et Vallem, exceptis illis quæ adquisivimus a domino Johanne de Nublans, et a terminis dictæ vallis de Blanos usque ad aquam Gradonæ, cum tota aqua prædicta sicut ducunt termini memorati, et quæcumque ecclesia Sancti Petri Cabilonensis habuit, possedit vel quasi tenuit per se vel per alium in villa de Contuberto, cum omnibus juribus et pertinentiis ejusdem villæ et molendino de Mascheron, excepta [etiam] ecclesia et decima de Contuberto, et excepto fœno et servitio quod nobis debetur de prato de Massilliaco; ita quod nos vel heredes aut successores nostri, vel aliquis nomine nostro vel ipsorum heredum vel aliquis de nostris non poterimus construere, ædificare aut adquirere vel retinere aliquid, vel habere aliquid infra terminos vel in terminis supradictis. Dedimus autem, cessimus et concessimus omnes actiones et jura quæ habemus vel habere debemus vel possumus quoquomodo in omnibus rebus supradictis, et domino abbati et conventui a nobis abdicamus in dominum abbatem et conventum Cluniacensem pro nobis et successoribus nostris pleno jure omni modo transferentes. Et si forte res supradictæ valerent ultra precium memoratum, et villam de Bello Monte cum omnibus appendiciis ejus, donamus et concedimus Deo et beatæ Virgini Mariæ, et beatis apostolis Petro et Paulo et ecclesiæ Cluniacensi pro nobis et successoribus nostris plus valens in helemosinam imperpetuum habendam et pacifice possidendam. Et de prædictis omnibus nos devestimus et dictum dominum abbatem recipientem nomine suo et successorum suorum et nomine ecclesiæ Cluniacensis investimus, et in corporalem et vacuam induximus possessionem. Juravimus autem, præstito super Sancta Dei evangelia juramento, pro nobis et successoribus nostris, et promittimus Deo et beatæ Virgini Mariæ et beatis apostolis Petro et Paulo, nos venditionem istam et omnia superius expressa imperpetuum rata et firma habere et tenere, nec aliquo modo contravenire, directe vel indirecte, per nos vel per alium, nec re, nec verbo, nec de jure, nec de facto. Promittimus etiam, sub eodem juramento, dictis domino abbati et conventui Cluniacensi, pro nobis et successoribus nostris, quod si aliquis super prædictis rebus vel super aliqua re earum, vel super jure pertinenti ad eas, eos impeteret, vel in causam traheret, vel in aliquo molestaret, nos pro eis opponeremus et ad justiciam responderemus, et ipsos deffenderemus in juditio et extra juditium, et expensas quas pro hujusmodi defensione faceremus ab abbate et conventu Cluniacensi petere non possemus; et si in defensione facienda, ut præmissum est, (quod absit!) deficeremus [et ipsos deficeremus], ita quod res prædictæ per judicium evincerentur vel aliqua ipsarum, teneremur de evictione, et ipsos bona fide, secundum jus et æquitatem servare in omnibus indemnes. Et res prædictas confitemur sub præstito juramento esse de libero alodio nostro, et eas tamquam proprium alodium prædictis abbati et conventui per præstitum juramentum tenemur, tam nos quam heredes nostri sive successores, imperpetuum contra omnes bona fide garantire; et nulli prædictas res vel aliquam earum donasse vel dominium seu possessionem earum in aliquem transtulisse, nec recognitionem aliquam alicui fecisse vel nos facturos promisisse. De dictis vero mille quingentis marchis et aliis confitemur, sub eodem juramento, nobis fuisse a dictis domino abbate et conventu plenarie satisfactum. Renunciamus ex certa scientia et sub religione præstiti juramenti exceptioni non numeratæ pecuniæ, precii non habiti et non soluti, vel non conversi in utilitatem nostram, vel non durantis, et exceptioni doli, et actioni et exceptioni quod metus causa, et omni beneficio juris generali et singulari, scripto et non scripto, promulgato et promulgando, quod nobis vel successoribus nostris ad revocandam venditionem istam vel aliquam partem istius venditionis ratione valoris majoris precii, vel aliqua ratione posset nobis vel successoribus nostris vel alicui alteri ullo tempore competere vel prodesse. Si vero prædictas conventiones, sicut superius sunt expressæ, in toto vel in parte non observaremus, volumus et concedimus, ut prædicti abbas et conventus nos super hiis coram domino rege vel coram judice ecclesiastico valeant convenire; addentes quod si nos nostrique successores, vel heredes prædicta omnia non servaremus vel contra aliqua occasione venire præsumeremus, quod nos abbati et conventui jamdictis et successoribus suis damna quæ propter hoc sustinerent resarciremus secundum justiciam et etiam æquitatem; obligantes inde realiter et personaliter stipulando nos et omnia bona nostra, mobilia et inmobilia, ubicumque posita. Nos vero uxor dicti domini Joceranni, prædictam venditionem laudamus, approbamus et concedimus, et juramus, præstito super sancta Dei evangelia juramento, ipsam venditionem inviolabiliter observare, et contra per nos vel per alium modo aliquo non venire nec de jure nec de facto; renuntiantes ex certa scientia et sub præstito juramento omni juri quod habemus vel habere possumus in rebus supradictis vel in aliqua earum occasione dotis vel ypothecæ, tacite vel expresse vel qualibet alia ratione et specialiter privilegio dotis. Et ego Henricus, filius dicti domini Joceranni, omnia supradicta, facta et concessa a patre meo et matre mea laudo, approbo et promitto, præstito super sancta Dei evangelia juramento, prædicta omnia imperpetuum me inviolabiliter observaturum; renuntians sub præstito juramento beneficio minoris ætatis et omni auxilio juris canonici et civilis, scripti et non scripti, promulgati et promulgandi. Et quia ego dicta domina et ego Henricus, ejusdem filius, sigilla propria non habemus, rogavimus venerabiles patres et dominos Haymonem, Matisconensem episcopum, Willermum, Cabilonensem episcopum, et dominum Jocerannum supradictum, ut sigilla sua præsentibus litteris apponerent in testimonium veritatis; quibus sigillis contempti esse volumus et eis fidem volumus indubitanter adhiberi. Et nos Jocerannus, dominus Branceduni, pro nobis et uxore nostra et H., filio nostro, ad noticiam rei gestæ et in testimonium veritatis dedimus et tradidimus dictis domino abbati et conventui Cluniacensi præsentes litteras sigillo nostro et sigillis venerabilium patrum H., Matisconensis, Willermi Cabilonensis episcoporum sigillatas, rogantes ipsos ut si in prædictis observandis nos vel heredes nostri deficeremus in toto vel in parte, quod nos compellerent ad prædicta observanda et tenenda per censuram ecclesiasticam, personas nostras excommunicando et terram nostram quilibet in sua diocesi supponendo interdicto. Et nos Haymo, Dei gratia Matisconensis episcopus, et Willermus, eadem gratia Cabilonensis episcopus, ad preces et ad instanciam dicti J., domini Branceduni, et [Helisabeth], uxoris suæ, et H., filii sui, hæc promisimus et præsentibus litteris sigilla nostra apposuimus, et dedimus et tradidimus dictis domino abbati et conventui Cluniacensi in testimonium rei gestæ, confitentes prædicta omnia secundum quod superius scripta sunt et adnotata, in præsentia nostra esse recitata et facta. Actum anno Domini M^o CC^o XXX^o sexto, mense marcio.