Litteræ quibus abbas Moisiacensis nuntiat abbati Cluniacensi electionem Raimundi de Casa in abbatem Figiacensem.
Venerabili in Christo patri ac domino H., Dei gracia Cluniacensi abbati, frater R., humilis abbas Moysiacensis, obedientiam tam debitam quam devotam cum salute. Cum, vacante ecclesia de Figiaco, venissemus ad dictum locum de mandato vestro, et vice vestra procederemus in ordinationem predicte ecclesie, reprobata electione cujusdam persone tanquam nulla, electionem Raimondi de Casa canonicam atque legitimam et de persona ydonea, auctoritate vestra in hac parte nobis commissa, dignam duximus confirmandam et confirmavimus, supplicantes quatenus predictam confirmationem ratam et gratam habeatis. Datum anno Domini Mo CCo XXXo septimo, mense maii.