Universis præsentes litteras inspecturis, Johannes comes et Aalais, comitissa Matisconensis, salutem in Domino. Noverit universitas vestra, quod cum nos abbati et ecclesiæ Cluniacensi in decanatu de Cluniaco et multis aliis locis multa damna et injurias fecerimus, contra cartas prædecessorum nostrorum injuste veniendo, et ipsi abbas et ecclesia Cluniacensis domino regi super prædictis de nobis fuissent conquesti, petentes ut dicta dampna et injurias eisdem et suis emendaremus et cartas [prædictas] prædecessorum nostrorum servaremus; tamdem prudentum et bonorum virorum habito consilio, ad cor redeuntes, prædictas cartas prædecessorum nostrorum veras esse profitemur, et nos injuste contra tenorem earundem fecisse protestamur, et eas innovamus et confirmamus, ut semper valeant et perpetuum robur obtineant firmitatis. Auctum anno Domini M^o CC^o XXXVII^o, mense januarii.