Charta qua Amedeus, dominus Montisfalconis, notum facit se Cluniacensi abbati in ducentis libris Turonensium teneri.
Universis præsentes litteras inspecturis, Amedeus, dominus Montisfalconis, salutem. Universitati vestræ notum facimus, quod nos reverendo patri abbati Cluniacensi, domino nostro, in ducentis libris Turonensibus tenemur, centum in instantibus nundinis Pruvinensibus persolvendas, et alias centum ad generale capitulum Cluniaci. Et hoc eidem abbati tamquam domino nostro promisimus bona fide. In cujus rei testimonium præsentibus litteris sigillum nostrum duximus apponendum. Actum anno Domini Mo CCo XXXo VIIIo, mense augusto.