Reverendo patri et domino in Christo karissimo domino priori Cluniacensi, frater Stephanus, humilis minister Beatæ Mariæ Theffordensis, salutem et obedientiam usque ad mortem. Cum ad præsens personaliter vestro frui optato non possimus colloquio, paternitati vestræ supplicamus, quatinus dilecto nobis in Christo fratri Dic., latori præsentium, in hiis quæ ex parte nostra discretioni vestræ explanaverit, fidem adhibere non dedignemini, voluntatem vestram et bene placitum vestrum, si quid erga nos volueritis, per eundem nobis significantes. Valeat paternitas vestra per tempora longiora.