Reverendo patri ac domino H[ugoni], Dei gratia Cluniacensi abbati, frater G. de Karitate et E. Sancti Martini de Campis priores, salutem et debitam obedientiam usque ad mortem. Noveritis quod nos de prioratu de Morlens, Lascurrensis diocesis, quem dilectus noster B., clericus domini comitis Atrabatensis, a nobis petierat ad vitam suam, et vos in disposicione et ordinatione nostra posueratis, sic ordinavimus, et dictum prioratum ei concessimus, si vobis placet, sub forma in nostris litteris contenta, quæ talis est: Universis præsentes litteras inspecturis, Guillermus de Karitate et Evrardus Sancti Martini de Campis priores, salutem in Domino. Notum facimus, quod cum dilectus noster B., clericus domini comitis Atrebatensis, peteret a venerabili patre abbate Cluniacensi prioratum de Morlens, La[s]currensis diocesis, sibi ad vitam suam concedi, et idem hoc venerabilis pater in nostra dispositione et ordinatione posuisset, scilicet quod dictum prioratum ei concederemus, si videremus expedire, nos in hoc bonum dicti prioratus attendentes, ipsum prioratum cum ejus pertinenciis dicto B. ad vitam suam duximus concedendum sub hac forma, videlicet quod ipse duobus monachis qui ibi deservient vitæ necessaria ministrabit, et dictum prioratum in æque bono statu conservabit, in quo est modo, ad ecclesiam Cluniacensem post ejus decessum cum omni melioratione reversurum, et quod post ejus decessum ad ecclesiam Cluniacensem cum melioratione revertatur, litteras archiepiscopi Auscensis nobis faciat haberi, atque censam dupplicabit, quam Parisius apud Sanctum Martinum de Campis reddet in festo Sancti Martini æstivalis annuatim, quandiu dictum prioratum tenebit, bonaque ipsius prioratus non alienabit, non infeodabit, non impignorabit, nec ad censum dabit, et jura et privilegia dicti prioratus pro posse suo defendet. In cujus rei testimonium præsentes litteras sigillorum nostrorum munimine duximus roborandas. Datum anno Domini M^o CC^o XL^o, in crastino sanctorum Jacobi et Christofori. Inde est quod paternitatem vestram rogamus, quatinus litteras vestras et litteras conventus Cluniacensis super concessione dicti prioratus in forma prædicta, si placet, concedatis et haberi faciatis atque latori præsencium tradi et priori de Morlens per vestras litteras mandetis, ut eidem B. liberet prioratum prædictum et bona prioratus, et mittat eum in possessionem ex parte vestra. Datum in crastino sanctorum Jacobi et Christofori, anno Domini M^o CC^o XL^o.