Litteræ S., subprioris Sancti Pancratii de Lewes, ad abbatem Cluniacensem, de excusatione pro absentia sua a capitulo generali.
Reverendo patri ac domino ... Dei gratia abbati Cluniacensi, frater S., humilis supprior ecclesiæ Sancti Pancracii de Lewes, et ejusdem loci devotus conventus, salutem et obedientiam debitam et devotam. Cum dilectissimus A., prior et pater noster, tocius corporis gravi valitudine ad præsens detineatur, propter quod ad celebracionem præsentis capituli generalis Cluniacensis accedere nequaquam possit, paternitati vestræ universi ac singuli supplicamus, quatinus excusacionem ægritudinis suæ, non solum nobis, sed etiam discretis viris de Wenelor et de Lencone prioribus, nuper apud nos existentibus visitatoribus, necnon et convicinis nostris notoriam et manifestam admittentes, ipsum in præsenti capitulo generali Cluniacensi, si placet, habere velitis excusatum, tantum facientes, ut nos vobis ad speciales gratiarum acciones assurgentes devocius ac districtius obligetis. Valeat sancta paternitas vestra semper in Domino.