Reverendo patri in Christo H[ugoni], Dei gratia abbati Cluniacensi, frater G., minister humilis ecclesiæ Sancti Salvatoris de Bermundens, et ejusdem loci conventus, salutem et cum summa reverencia debitæ subjectionis obedientiam. Cum domus nostra de Bermundens, de qua trium annorum decimas exigitis, tot ruinarum, sterilitatum, debitorum et aliorum incommodorum sit exposita periculis, ita quod vix sibi possit sufficere, quod vestram non credimus latere prudentiam, sanctitatis vestræ pedibus provoluti, flexis genibus, fusis lacrimis, vobis humiliter supplicamus, quatenus indigentiis nostris paterno affectu compatiendo, nuntium nostrum sollempnem ad capitulum generale expectare velitis, qui oppressionem domus nostræ vobis plenius poterit explicare. Et omni qua possumus devocione paternitatem vestram, de qua non modicam reportamus fidutiam, suppliciter exoramus, quatinus erga nos misericordiæ vestræ abundantiam sic ostendatis ne nos, qui in conspectu omnium habitamus et spectaculum sumus regi et regno, paupertatis stimulo penitus consumamur. Promittimus autem sanctitati vestræ, quod licet non sint mendicantium suffragia copiosa, tamen ultra quam vires nostræ suppetant vobis subveniemus, subtrahentes nobismet ipsis in parte quæ victui nostro sunt necessaria. Valeat sanctitas vestra semper in Domino.