Viris venerabilibus et discretis Hugoni, abbati, et conventui Cluniacensi, et Guichardo, priori Sancti Martini Masticonensis, Cluniacensis ordinis, Hugo, prior Cartusiensis, totumque capitulum generale, salutem in Domino sempiternam. Tenore præsentium vobis facimus manifestum nos conpositionem quæ inter vos, ex parte una, et carissimum nostrum in Christo P., priorem Vallis Sancti Stephani et ipsam domum, ex altera, concorditer factam super quibusdam possessionibus ad vos pleno jure [s]pectantibus, sicut in litteris inde anno Domini M^o CC^o XXX^o IX^o, II kal. aprilis, confectis continetur, ratam habere pariter et acceptam, promittentes ut si ipse prior seu successores ejus vel domus etiam nominata, casu aliquo contingente, nollent conpositionem servare eandem et quæ continentur in ipsa inviolabiliter observare, nos auctoritate in universo Cartusiensi ordine concessa capitulo generali ad ea fideliter adinplenda compelleremus eosdem. Datum anno Domini M^o CC^o XXX[X^o].