Litteræ benefactorum ecclesiæ Sancti Vincentii de Salamantica, ad abbatem Cluniacensem, quibus promittunt novas largitiones, si abbatem in domo illa instituere procuret.
Venerabilibus viris ac religiosis U[goni], abbati, et conventui Cluniacensi, nos benefactores ecclesiæ Sancti Vincencii, P. de Genzaque, P. de Limoges, P. de Reimondina, domina Mayor, una cum concilio Salamanticæ civitatis, et omnibus aliis benefactoribus ejusdem ecclesiæ, salutem et obtatæ beatitudinis perfrui largitate. Religiositati vestræ universaliter præsentibus declaretur, quod nos, intuitu pietatis et causa redemptionis tam animarum nostrarum quam parentum nostrorum, prædictam ecclesiam, Domino disponente, ad meliorem statum cupimus toto animo promovere. Unde cum in hoc et in aliis quamplurimum vestro indigeamus auxilio, vestram religiositatem omnes unanimes exoramus humiliter ac devote, quatinus in jam dicto loco Sancti Vincencii abbatem instituere procuretis. Et nos obligamus nos
et promittimus ponere XXX juga boum in hereditatibus, quæ incultæ et alienatæ temporibus multis bobus deficientibus permanserunt. Colemus etiam vineas, quæ jacent incultæ, videlicet LXX aranzadas. Exceptis his habet supradicta ecclesia X jugatas bene cultas, duas azeniarum rotas, duos molendinos, quandam aldeolam, quæ vocatur Fratres. Promittimus etiam in Domino tot hereditates æterne emere alias, et tot vaccas, equas, oves, ut abbas qui ibidem fuerit institutus canonice cum XII vel pluribus monachis possit vivere ad Dei et hominum servicium et honorem honorifice ac honeste. Amplius, si abbas ibi fuerit institutus, vobis unam marcham argenti super incenso annuatim debito augmentamus et in præsenti abbati et conventui quingentas libras in helemosina erogamus.