Reverendo in Christo patri ac domino U[goni], Dei gratia abbati Cluniacensi, R., Figiacensis ecclesiæ minister humilis et indignus, salutem et obedientiam cum omni reverencia et honore. Placuit paternitati vestræ auctoritate apostolica nobis dare in mandatis, ut abbatem Sancti Marcialis Lemovicensis citaremus, quod in proximo festo diei dominicæ Resurrectionis una vobiscum et aliis abbatibus Cluniacensis ordinis apostolico se conspectui præsentaret; quod effectui mancipavimus diligenter. Et ut vos certos reddamus, præsentem cartam sigilli nostri munimine duximus roborandam. Datum apud Figiacum, feria secunda ante festum Purificationis beatæ Virginis, anno ab incarnatione Domini M^o CC^o XL^o.