Magister W., archidiaconus et officialis Matisconensis, universis præsentes litteras inspecturis, rei gestæ noticiam cum salute. Noverit vestra universitas, quod Guichardus, præpositus de Jalogniaco, quicquid habebat vel habere poterat in præpositura de Jalogniaco, et domum suam sitam in prædicta villa, et medietatem nemoris quod dicitur Brucia, et janestariam sitam juxta condeminam del Tronchet, et medietatem terræ quæ dicitur Alacte, et dimidium allodium situm sub Alloete, et medium pratum situm juxta, et terram quæ dicitur Euvrardi, et omne illud quod habebat vel habere poterat in territorio de Jalogniaco; similiter omnia præmissa et quicquid in omnibus præmissis habebant vel habere poterant quittaverunt ecclesiæ Cluniacensi et domui de Jalogniaco Petronilla, uxor dicti Guichardi, de mandato mariti sui, et Stephanus et Perroneta, filii dicti Guichardi. Promittentes prædicti Guichardus et Petronilla, ejus uxor, et Stephanus et Perroneta, filii sui, se prædictam concessionem, venditionem, quittationem, et omnia præmissa superius annotata servare et tenere, et non contra venire in perpetuum, præstito corporaliter super sancta Dei evangelia juramento. Renunciantes omni actioni personali et reali, sive in rem, sive in personam competenti, et specialiter actioni in factum, exceptioni doli, quod metus causa, non numeratæ et non traditæ pecuniæ, minoris ætatis, et omni juris beneficio, et omnibus actionibus et exceptionibus eis competentibus vel deinceps competituris. In cujus rei testimonium et confirmacionem, ad instanciam et peticionem prædictorum Guichardi et Petronillæ, ejus uxoris, et Stephani et Perronetæ, filiorum suorum, sigillum curiæ Matisconensis præsentibus apposuimus. Actum die mercurii post festum beati Dyonisii, anno Domini M^o CC^o XL^o secundo.