Nos Seguinus, miseratione divina Matisconensis ecclesiæ minister humilis, universis præsentes litteras inspecturis, rei gestæ noticiam cum salute. Universitati vestræ notum facimus, quod Raynaldus Discalciatus, dominus Buxeriæ, in nostra præsentia constitutus, pro remedio animæ suæ et parentum suorum donavit et in puram et perpetuam elemosinam concessit et quitavit Deo et ecclesiæ Cluniacensi quicquid juris seu dominii habebat vel habere debebat seu aliquo modo reclamare poterat in villa Sancti Poncii et in ea quæ vocatur Mons Franciæ, in terris, hominibus et rebus aliis quibuscumque ad ecclesiam Cluniacensem pertinentibus, nichil omnino juris in dictis villis, terris, hominibus, seu rebus aliis sibi retinens præterquam avenam, gallinas et panes unius denarii, quæ de garda in prædictis villis et hominibus consuevit et dignoscitur recipere et habere. Quæ videlicet avenam, gallinas et panes in nostra præsentia ab ecclesia Cluniacensi accepit in feodum et de ipsis fecit homagium Cluniacensi ecclesiæ et idem tenetur abbati facere ad ejusdem [abbatis] requisitionem; et proinde habuit et recepit idem Raynaldus viginti et quinque libras Cluniacensis monetæ, prout in nostra præsentia publice recognovit. Insuper res omnes præmissas, videlicet donationem eidem ecclesiæ factam et res alias quas ab eadem ecclesia accepit in feodum præfatis abbati et ecclesiæ Cluniacensi bona fide contra omnes garantire promisit. Nos etiam, ad instanciam prædicti Raynaldi, qui se et sua jurisdictioni nostræ spontanea voluntate subjecit in hac parte, præfatis abbati et ecclesiæ Cluniacensi bona fide promisimus, quod si idem Raynaldus vel aliquis alius nomine suo contra præmissa vel eorum aliqua venire præsumeret, nos in ipsum excommunicationis sententiam proferremus, nec relaxaremus eandem, quousque de illatis injuriis cum ipso dampno et interesse prædictis abbati et ecclesiæ esset plenarie satisfactum. Prædictus vero abbas gardam comitis Cabilonensis vel alterius cujuscunque tenetur a prædicta villa Montis Franciæ amovere. In cujus rei testimonium, confirmationem atque perpetuam stabilitatem præsentes litteras ad instantiam et preces memorati Raynaldi, domini Buxeriæ, sigilli nostri munimine fecimus roborari. Actum anno Domini M^o CC^o quadragesimo tercio, mense aprili.