Universis præsentes litteras inspecturis, Seguinus, permissione divina Matisconensis ecclesiæ minister humilis, rei gestæ noticiam cum salute. Præsentium vobis insinuatione significandum duximus, quod Reynaldus, dominus Buxeriæ, in nostra præsentia constitutus, confessus est se obligasse venerabilibus et religiosis viris priori et conventui Cluniacensis ecclesiæ, pro viginti quinque libris Cluniacensis monetæ, quas habuit in pecunia numerata, quicquid possessionis, quicquid juris habebat vel habere poterat in villa Sancti Poncii et in villa quæ vocatur Mons Franciæ, quod totum movet de feodo Cluniacensis ecclesiæ, recognovit, promittens insuper, sub præstito tactis sacrosanctis evangeliis juramento, se contra præmissam obligationem nunquam per se vel per alium venturum, eandem memoratis priori et conventui inconcussam et pacificam servaturum, [tam omni exceptioni] quam juris cujuslibet beneficio, quod eidem R. contra eandem obligationem seu contra tenorem præsencium posset in posterum competere vel prodesse, sub præmisso nichilominus renuncians juramento. Ut autem præmissa robur obtineant firmitatis, sigillum nostrum ad instantiam supradicti Reinaldi præsentibus deposuimus in testimonium et munimen. Actum et datum anno Domini M^o CC^o XL^o III^o, mense aprili.