Reverendo in Christo patri ac domino H[ugoni], miseratione divina venerabili abbati Cluniacensi, frater Fulco, humilis abbas Monasterii Novi Pictavensis, totusque ejusdem ecclesiæ conventus, salutem et reverenciam et obedienciam tam debitas quam devotas. Paternitati vestræ humiliter supplicamus, quatinus dilecto fratri nostro in Christo J., priori de Faia Monachali, latori præsentium, quem ad vos cum nostris litteris destinamus, super hiis omnibus quæ vobis a parte nostra dixerit, si placet, tamquam nobis credatis, tantum inde facientes quod ad honorem Dei et vestri et ad honorem Cluniacensis ecclesiæ et nostræ pariter videatur. Datum in vigilia Purificationis beatæ Mariæ, anno Domini M^o CC^o XL^o tertio.