Notum sit universis præsentes litteras inspecturis, quod nos Guichardus, dominus de Yone, et Philippus de Castellione, miles, promittimus bona fide, tactis sacrosanctis evangeliis, vobis domino abbati Cluniacensi et conventui ejusdem loci quod nos servabimus indempnes vos et vestros, res vestras et vestrorum ab omni dampno atque gravamine quod posset evenire vobis vel vestris ratione cujuslibet querelæ quæ ab aliquo vel ab aliquibus proponeretur contra vos vel vestros occasione Johannis, quondam domini de Castellione, qui elegit in vestro monasterio sepulturam. Et præterea testificamur quod dictus Johannes in præsentia nostra penitus quittavit vobis et ecclesiæ vestræ quicquid petebat racione guardæ sive dominii quod dicebat se habere in domo vestra de Chavariaco vel in hominibus ad eam pertinentibus, et si quid juris ibi habebat, totum vobis et ecclesiæ vestræ in elemosinam pro remedio animæ suæ et antecessorum suorum dedit pariter et concessit. Ad majorem autem prædictorum firmitatem et certitudinem, præsentes litteras vobis tradidimus sigillorum nostrorum munimine roboratas. Actum anno Domini MCC quadragesimo quarto, in festo beati Petri ad Vincula.