Innocentius episcopus, servus servorum Dei, ad memoriam et observantiam perpetuam, contra gravamina que in procurationibus ratione visitationis debitis inferebantur subditis a prelatis, providerunt salubriter canonica instituta circa evectionum et personarum multitudinem, epularum inmoderanciam aliasque superfluitates, statuendo modestiam debitam observari, ut nec in exigendo nimium prelati excederent, nec in exhibendo superflue subditi gravarentur, fieretque visitatio ad salutem animique leticiam et non ad afflictionem et tedium subditorum. Verum quia nonnulle adhuc de hujusmodi procurationibus querimonie audiuntur, nos volentes pastorali sollicitudine providere taliter in hac parte, quod tollatur omnino gravandi occasio et cesset prorsus materia murmurandi, apostolica auctoritate statuimus ut archiepiscopis, episcopis, archidiaconis, aliisque prelatis personaliter visitantibus ab ecclesiis et locis visitatis exhibeantur procurationes in victualibus et aliis necessariis moderate, ita quod hee secundum communem rerum extimationem singulorum locorum vel sumptus qui pro hiis fient summam seu valentiam quatuor marcharum argenti in nulla procuratione transcendant, proviso tamen quod secundum majorem vel minorem evectionum numerum pro majoritate vel minoritate prelatorum in consilio (sic) Lateranensi taxatum fiant usque ad summam ipsam vel infra hujusmodi procurationem expense. Sed in locis in quibus major fertilitas vel copia rerum habetur et ubi minores sunt redditus seu ecclesiastice facultates, minus secundum ampliorem necessariorum ubertatem et parvitatem proventuum in ipsis procurationibus expendatur. Si autem amplius in hujusmodi procurationibus fuerit expensum, prelati eas recipientes restituere in utilitatem ecclesiarum a quibus ipsas receperint et illi qui eas exhibuerint erogare de suo proprio pauperibus duplum ejus quod taliter ultra expensum extiterit compellantur, alia nichilominus pena mulctandi, si visum fuerit expedire. Ceteris nichilominus que pro hujusmodi visitationibus et procurationibus generaliter statuta esse noscuntur manentibus semper salvis. Nulli ergo, etc. Datum Lateranni, II kal. marcii, pontificatus anno undecimo.