Universis præsentes litteras inspecturis, frater Guillermus, humilis abbas Figiacensis, salutem in Domino. Universitati vestræ notum facio, quod cum electus essem in abbatem ecclesiæ Figiacensis, volens prædecessorum meorum vestigiis inhærere, accessi ad Cluniacensem ecclesiam, matrem nostram, et obtenta a domino Hugone, ejusdem ecclesiæ abbate, confirmatione electionis meæ, promisi eidem et successoribus ejus obedientiam in pleno capitulo Cluniacensi, præsente domino Raimondo, abbate Moisiacensi, et Girardo Bello, camerario Figiacensi, et Bertrando, sacrista Figiacensi, et Girardo de Sala, capellano de Petrucia, Rutenensis diocesis, et multis aliis. In cujus rei testimonium, prædictas litteras tradidi ecclesiæ Cluniacensi sigilli nostri munimine roboratas. Actum anno Domini M^o CC^o XLIIII^o, mense martio.