In nomine Domini nostri Jesu Christi. Amen. Anno nativitatis ejusdem MCCXLV, pontificatus domini Innocentii papæ quarti anno tertio, mense julii, die sexto decimo, in præsentia mei Noclerii, scriniarii, et testium subscriptorum, ad hoc specialiter vocatorum et rogatorum, dominus Guillermus, venerabilis abbas monasterii Cluniacensis, cum consensu fratrum Henrici, Johannis et Aimonis, monachorum ejusdem ordinis, qui præsentes erant, et dominus abbas monasterii Sancti Ægidii Nemausensis diocesis, cum consensu domini Poncii, prioris de Cerverio, domini prioris de Torsiaco, et Bertranni de Monteliis, monachorum ejusdem monasterii, ex altera, pro se et monasteriis ac successoribus suis, obligantes se et fideliter promittentes, quod ipsi procurabunt efficaciter omni modo quo poterunt, quod conventus eorum subscripta omnia rata et firma habebunt, compromiserunt pro se et monasteriis suis et eorum successoribus, in religiosos viros, scilicet: in magistrum Gaufredum, priorem Podioleni, monachum ordinis Cluniacensis, et in magistrum Petrum de Castris, priorem de Siura, monachum ejusdem monasterii Sancti Ægidii, super omni subjectione quam abbas et conventus Cluniacensis habet vel habere posset in præfatos abbatem et monachos monasterii Sancti Ægidii prædicti, et super visitatione, correctione, reformatione, procuratione, reverentia, et de abbate assumendo de monasterio illorum, et de sessione abbatis Cluniacensis, et institutione et destitutione, et super omnibus aliis juribus, subjectionibus et jurisdictionibus ac rationibus quas habent vel habere possent, peterent seu petere possent abbas et conventus Cluniacensis prædicti in præfato monasterio Sancti Ægidii, et abbate ac fratribus, sicut dictum est, tanquam in arbitros, arbitratores, laudatores, statutores, sententiatores, ordinatores et amicabiles compositores, dantes uterque eorum pro se et conventu suo plenam potestatem et quicquid ipsi semel vel pluries arbitrati fuerint seu laudaverint, sententiaverint, ordinaverint, statuerint, seu amicabiliter composuerint, partibus præsentibus vel absentibus, citatis et non citatis, die feriato et non feriato, juris ordine servato vel non servato, ratum et firmum, pro se ac eorum successoribus et monasteriis et fratribus, perpetuo habebunt, nec in aliquo eorum contravenient, sub pœna quingentarum marcarum argenti solvenda parti a non servante servanti, et totiens committatur in pœna quotiens in aliquo capitulo ab aliqua partium contra fuerit factum, et pœna soluta nihilominus compromissum et arbitrium quod arbitrati fuerint seu statutum vel ordinatio in sua permaneant firmitate. Dederunt etiam potestatem eisdem interpretandi et declarandi dubium seu quæstionem, si ex eorum dictis oriretur. Et hæc omnia supradicti abbates promiserunt firmiter observare et adimplere et bona fide procurare quod conventus eorundem una cum eisdem, sicut dictum est, super prædictis omnibus compromittant ac assentiant compromisso prædicto et rata habeant quæ superius annotantur. Præterea dicti abbates promiserunt bona fide apud dominum papam studiose et fideliter laborare, ut ea quæ per prædictos arbitros arbitrabuntur per litteras suas confirmabit. Quod compromissum dicti magister Gaufridus, prior Podioleni, et magister Petrus de Castris, prior de Siura, uterque de mandato sui abbatis, receperunt. Actum Lugduni, coram hiis testibus, scilicet magistro Bartholomæo Venefrano, teste; Thomasino Brico, teste; Rostanno de Margaritis, teste; Johanne Pica et Ogerio Vasco, testibus; Johanne de Insula, teste; Guillermo Rostanni, teste; Bernardo Lurdo, clerico, teste; Petro Ranulfo, teste. Ego Noclerius, auctoritate imperiali scriniarius, prædictis omnibus interfui, et hoc instrumentum de mandato utriusque abbatis scripsi et complevi rogatus.